20190612
三十年後，如果有人問你，2019年6月12號，612果日你做過咩，你會點答？
我諗咗呢個問題好耐，我係廁所坐到腳都痺埋，因為我好猶疑，坦白講直程係驚。大佬呀，萬一癲起上黎真係開槍，你驚唔驚？
我腦海入面閃過好多原因，返工、返學、攰、驚、懶，每一個都足夠說服我唔好出黎。只要你呃到自己，只要你覺得心安理得就可以，因為唯一一個知道你果日做過咩既人，係你自己。
但我諗，我會出。
唔出黎，可以有好多原因，而出黎，原因只有一個——我唔想自己後悔。聽日出到黎會做咩，我自己都唔知，依家其實好亂，無領袖，無人敢咩飛，痴線既咩，成群人坐監既坐監，走佬既走佬，後果幾嚴重先得架。
我唔知出黎有無用，但我覺得如果我選擇唔出，我會後悔，而我好憎後悔既自己。我唔想三十年之後，當仔女問我612做過乜，我同佢講話我憨鳩鳩咁過咗一日，我想我呢世人可以做一次英雄，一次咁多，好唔好？
我希望，三十年後當我答呢條問題既時候，我可以大聲同人講，我果日出左黎，甚至只係出黎，然後見到速龍隊就驚到匿埋咗，無人會笑你，因為你盡咗力。
唔好比自己後悔，人一世，最怕就係後悔。
如果神佛唔保佑我地，我希望你會支持我地。
如果歷史無記住我地，我希望你會記住我地。
如果可以，我希望20190612呢個日子唔再只係一串數字，或者一個普通既日子，我希望20190612成為我地既日子，我地既歷史。
#20190612
Search